Voci di Ieri

Lontano da Ponza. Trova tutti gli articoli nel menù: “Storia”

Immagini

k2-19 m2-10 ss13 68b 99 allarme-aereo

‘A ggente mia

di Francesco De Luca

E’ tempo di stringerci assieme. Di trovare il senso della nostra appartenenza

 .

‘A  ggente  mia

’A ggente… sì… ’a ggente,
’a ggente ca ’ncuntre abbasce ’a piazza,
’ncopp’a banchina addo’ attracca ’u vapore,
ammiezz’a via
quanno te retire pecché s’è fatta ll’ora.

’A ggente ca te saluta cu ’na mossa,
ca te fa i cunte ind’a sacca,
ca si nun sape i fatte,
t’i dummanne.

Pe’ tutte chist’ anne
t’ ha accumpagnate ind’a vita.
Aiere iucave ’a partita a Ciancosse,
t’ arricuorde?…
e mo i cosce tremmeno p’ i  dulure ind’all’osse.

Si te mitte a penza’…
quante facce passeno p’a mente !
So’ uagliune c’a cartella a tracolla;
so’ giuvene ca parteno
pe se luva’  ’a miseria ’a cuollo;
so’ viecchie avvelute d’a fatica.
Stanne tutte ind’a ll’uocchie,
ind’i mane,
ind’u core.

So’ lloro
ca te accumpagneno
p’a sagliuta ’i Girdo Culonna
e cu’ lloro stappe i buttiglie
ogne primme ’i ll’anne.

Certo, avessemo potuto campa’
cu’ cchiù suddisfazzione
si avessemo capito primma ’a lezzione.

’A luna monta ogni sera
e te mmezzéa
comme he fa’ fesso ’u dimane,
quanno chi te sta vecino te rompe ’u cazzo
o te fa senti’ cuntento,
pecché ’na mano
modestamente ll’he data
pe fa’ ’u futuro meglio d’u passato.

Nesciuno se mmereta niente…
eppure tutti t’hanno fatto ricco.
Nesciuno è meglio ’i te
eppure… nun vali ’na cicca.

Duie uocchie vispe
ind’a ’na faccella allera
me fissano sincere.
“Mae’, ’nte ricuorde ’i me ?
So’ ’u figlio ’i Veruccio!”
“ Scusa ’uaglio’, ’u maesto s’è fatto viecchio,
ce mette tiempo a piglia’ ’a fisionomia.
Fa’ tanta furtuna
quanta ne porta a me ’stu saluto ”.

Pecché vene ’u vierno e vene ’a notte,
vene ’u dulore e vene ’a morte,
ce starà sempe ’a ggente mia
a me fa’ cumpagnia.

 

 

Questa la versione recitata

Devi essere collegato per poter inserire un commento.