





|
|||
Sole ’i fuoco
Abbasce Santantuono è ’nu furno, meno male ca ce stanno chelle quatte piante, addò ’a sotto, ’ncopp’ i panchine, t’assitte, te susce e piglie respire. A Ciancosse staie sotto a ’na cuperta vullente, ma chist’anne, quanno proprio ’nce ’a faie cchiù, te vutte a mare e pe’ ’nu poco t’addefrische. Attenzione a i viggile però… So’ furastiere, fanno multe a uocchie chiuse, tanto fra ’nu mese, pe’ lloro ’a vacanza è fenuta. Pe’ Corso Pisacane, ’u sole te squaglia sane sane. ’Na vota ce steve Chiailuna… ive i ’ll’unnece, te facive ’u bagno e all’una già stive a’ casa, vecino ’u tavulo, pronto cu’ i piatte. Mò pe’ fa’ ’nu bagno hè ì luntano, c’a lanza, o a Fruntone. Ma si no hè schiatta’. ’U sudore cala d’a fronte, s’azzecca a’ maglietta ’ncuollo, sotto ’i braccie pare ’na funtana. Te firme ’u bar… : “…Damme ’na limunata…”. ’Na sursata… e ’u cuorpe piglia ristoro, ma appena faie quatte passe, ’nce sta salvezza: si’ ’na spogne ’i sudore d’a capa ’u pede. Vulisse iastemma’, ma t’hè mantène pecché senza ’u sole ’nfierno, i turiste nun lascieno ’i città e nuie cca stamme senza fatica’. Zitto… facimmo finta ca simme uommene ca ’u sole ’u supporteno. “’U tenimmo pe’ tutto ll’anno… che fa mò ca ce sta abbabbianno”. I punzise so’ abbituate a i patemiente, basta ca ce sta ’a guadagna’ p’u vierno. “Sole può ’ncasa’ comme vuo’ tu, male ca va, ce ne iammo maramare. Tenimmo cale e calette, e ll’acqua llà è caude comme ind’a vasca da bagno. Ce sta Parmarola, ce sta Zannone, e llà, oltre a ’u cuorpe t’addefrische pure ll’annema. E’ pe’ cheste ca i turiste assommano a muntune ’nse ne vonne ì. “Fanno bbuono!” Bagnate ’i sudore e c’a lengua scesa benedecimme… “Viva ’a staggione ca ’u caude ’nce pesa”.
P.S.
1 commento per Sole ’i fuocoDevi essere collegato per poter inserire un commento. |
|||
Ponza Racconta © 2021 - Tutti i diritti riservati - Realizzato da Antonio Capone %d blogger hanno fatto clic su Mi Piace per questo: |
…. e dopp’ u sole ‘i fuoco venette ll’acqua i cielo!