di Francesco De Luca
A core a core
A Giancosse iocheno a pallone
doie squadrette ‘i uagliune.
Menu male ca ce stanno lloro…
spanneno ‘u rummore d’u iuoche.
ca s’ammesche cu ‘i resate d’ i criature llà vecino
ca saglieno ind’u scivolo
e s’annasconneno ind’ a casarella ‘i legno.
‘U pomeriggio d’u vierno è curto
e stu poco ‘i chiarore s’hadda sfruttà
primma ‘i se nserrà ind’a casa.
Nun è tanto ‘u friddo
quanto l’ummedità ca spercia (1) ll’osse.
Pure chella figliola pare ca l’ummedo d’ u mare llà vecino
nun ‘u supporta.
Se strufina i mane,
gira ll’uocchie a na parte e a n’ata,
s’aizza, fa duie passe
cerca quaccosa
o forse quaccheduno.
Aspetta,
e dà ‘a vvedé ca ce tene.
‘A figliola tene a bellezza d’a giuventù
e ‘i grazzie ca ce ha dunate ‘a mamma.
Essa aspetta,
e me mette ‘u pepe pure a me.
Ah…
finalmente s’ aizza e corre.
Addò corre?
Corre ‘mbraccio a nu giovene
ca è cumparso comme nu fruncillo.
Menu male…
M’acquieto pure io.
Lloro, abbracciate, pigliano a via d’ u puorto.
‘A sera l’ accumpagna.
‘U vierno addeventa scasuna
pe se stregne cchiù a core a core.
note: (1) penetra
Questa la versione recitata
