di Francesco De Luca
Non è beneaugurale, lo so, ma i responsi sono quelli che sono, non sono addomesticabili, perciò…
Pe ll’ anno ca vene
Si n’ anno fa
avesse saputo
ca chist’ anno
era nu male anno,
avesse miso a capa ind’ u furno
e tutto ‘nzevato (1) ‘i cennere
avesse alluccato:
susiteve… ggente… fuite,
facite fatture e pratiche ‘i streghe
na disgrazzia ce sta ‘ncuollo comme na sega.
Ma… niente aggio previsto
e tutto è stato
comme ha vuluto Cristo.
E mo… stammo ‘ncap’a dudece…(2)
pe ll’ anno ca vene
tenimmo tiempo:
aizzammo mure e ripare,
scummudammo litanie e rusarie:
pe nuie
na brutta ciorta (3)
s’ apprepara.
Arrassa (4), Signò,
sta malaparata!
Tra guerra, covid, ‘u gghiaccio ca se squaglia
e stu Guverno
ca pare nu ciuccio ca raglia…
mantenimmece stritto
i cunvinzione noste
ca si no iammo a mmeste (5),
nun sulo,
ma pure ‘i chiacchiere ‘mbriacate
e cu cazone avasciato.
Note: 1- sporco; 2- stiamo allo stesso punto; 3- sorte; 4- allontana; 5- andiamo a sbattere.
La versione recitata
