di Francesco De Luca
Notte d’austo
L’occhiolino d’ u Faro d’ a Madonna m’ è cumpagno
ind’ a sta notte scura e quieta
pure si i lucelle d’ i varche brillano
ind’ a cala Gaitana, ind’ u Core, inde Fruntone,
e nte dico ca ce sta ind’ u puorto
ammasato ‘i varche comme acciughe.
Luntano… verso a Votte… (1) doie lampare
stanno pescanno ‘a alici.
A notte è nera tomba…
nse move na foglia manco pe scummessa.
E’ u tiempo d’ a Quinnecina (2)
… t’ arricuorde…
ind’ i grariate
nfacci ‘a Madonna d’ a cappella.
“Regina de lu cielo
putentissima maistà,
sta grazzia ca te chiedo
fammella pe pietà…”
Zì Olimpia cummannava u rusario
e i criature,
comme tanta strummulille (3) senza cchiù corda,
abbabbiate (4) da i canzone ‘i chiesa.
“Voce ‘i notte te sceta ind’ a nuttata”…
sunava na chitarra ind’ u vicolo
e i femmene rereveno malizziose
e duie giuvene pruvaveno a accurdà i vvoce.
Notte d’ està,
senza na rille, (5)
ind’ u cielo i stelle a mille,
manco nu ciato ‘i viento,
cu l’ animo cuntento
‘i chesta meraviglia.
Comme nu suonno
è rimasta.
Passa u tiempo
e nun s’ u piglia.
Note: 1 – scoglio della Botte; 2 – pratica religiosa eseguita nei rioni davanti alle cappelle votive;
3 – trottola di legno; 4 – insonnoliti; 5 – grillo.
Questa la versione recitata in mp3
NdR: la foto di copertina è di Dimitri Scripnic
