Francesco De Luca
Cu ll’ acqua a zzeffunno
E’ quanno chiove a zeffunno (1)
ca ll’ annema tocca u funno,
e a mente ‘a strapazzano i penziere,
vestute a lutto,
e lamentano malatie,
e ricordano bucìe.
Viento e acqua nfaccia i lastre (2),
u mare vatte i scoglie e maie nce abbasta.
Addeviente comme na cosa
c’ aspetta da u cielo
chello ca manna.
E tiene paura ca u peggio
hadda ancora venì.
U contrario
’i quanno ire (3) uaglione,
e ogne cosa era na scusa
pe pruvà meraviglia:
cu ll’ acqua a zzeffunno
currive comme na rilla (4),
e c’ u viento nfaccia
p’ a paura d’ a rena chiudive ll’uocchie.
L’ aità era serena:
fore ntrunava (5)
e nuie iucavemo.
Mo
a paura è cchiù presente,
e ‘i bbuono
nun t’ aspiette proprio niente.
la versione recitata
Note: 1 – a dirotto; 2 – vetri; 3 – eri; 4 – grillo; 5 – tuonava.
