di Francesco De Luca
.
Estate di fuoco. Non si è potuto fare a meno delle vacanze. Nel senso di mettere spensieratezza nelle preoccupazioni. Con una certa difficoltà, invero, perché la situazione generale (…capisci a mme!) si è infervorata. Con nuove battaglie, nuove strategie, con divorzi e innamoramenti.
La Storia si arricchisce di capitoli e anche Ponza racconta non è stata esente da riflessioni (storiche) e da ricordi (storici), come si confà ad osservatori accorti.
Quella che presento è una digressione che può ben inserirsi ai margini di quelle speculazioni. Ai margini però.
[1]
’A Storia?
’A Storia… è ’nu cunto !
È comme ’na pazziella !
Ognuno ce mette ’u ssuie:
allonga,
taglia,
azzuppa
o refonne ’u brodo c’ a cuccumella.
Da i fatte passate
ognuno piglia
chello ca pare a isso.
E perciò…
mo so’ bbuone chille ch’ aiere ereno ’mbrugliune.
Dice: però ’a Storia se basa ’ncopp’ i fatte.
Sì… i fatte…
comme si nun se sapesse
ca i fatte ca succedeno
so’ ’na cosa
e i fatte ca se diceno
so’ ’n’ ata cosa.
Dice: ma ’a storia
’a fanno chille ca raggionano,
e mettono i fatte ’mprucessione
uno arete all’ate,
accussì se capisce
comme se songo avverate.
E allora… ve conto storia ’i ’Maculatina
Chella, ’a signora, ’i famiglia bbona,
se vuleva da’ ’nu tono.
’U marito faceva ’u meccanico,
ma ’i chella chiave llà
nun era pratico.
’A meschenella se senteva disprezzata
accussì cu’ ’nu banchiere
se dette ’n’accurdata.
Isso sì… teneva i maniere aggrazziate.
Ceccillo sempe cu’ chella tuta ’nsevata ’i grasso.
Vo’ mettere c’ u banchiere…
che figura… p’ i vvie… a spasso.
“Ceccì… sta macchina nun funziona”
– deceva ’a mugliera pe’ ce dà ’na scetata.
“Eee… cchiù tarde ce dongo ’na guardata
– Respunneva ’u stunato –
e nun s’avvedeva ca ce steva ’a sbandata.
’Maculatina… cu’ bbona salute…
iucava doie partite c’u stesso mazzo.
E oramaie tutta ’a ggente
sapeva l’andazzo.
Sulo Ceccillo
durmeva a piede, tranquillo.
“Gesù… tu ’uarda a chillo…
– deceva ’Maculata –
elegante, profumata, cu’ i tacche a spillo –
o ce ’a dongo ie ’a nutizzia,
almeno me levo ’u sfizzio
’i ’n’ appeccecta,
’i ’n’ alluccata,,
insomma… ’i fa’ parla’ ’u paese
ind’ u mercato e dint’ a chiesa.”
Accussì… ’nu iuorno…
ca oramaie ’a votte era chiena,
affruntaie ’u marito e ce decette:
“Ué, Ceccì, mo’ t’ u dico ie
primma ca t’ u diceno ’ll’ate:
ie me veco cu’ chillo ’mpiegato ’i banca,
…chillo ca tene ’u pizzotto
e quanno parla… arranca.
nuie simme… amante
…’u fatto oramaie è lampante.
tu ’nte ’ntusseca’ ’a salute,
chello ca c’è stato fra nuie
’ns’è perduto.
Ie te voglio sempe bbene
…a te nun te lascio,
’n te piglia’ pene.
Ceccillo, llà pe’ llà, puveriello,
remmanette ’ntesecute comme ’na sardella.
S’asseccaie ’a lengua ’nganna, ’ncassaie ’u colpo
e nun decette nemmeno: aiuto mamma !
’Maculata pareva ’na gallina faraona,
pronta a s’avventa’ contro a chi ce tuccava ’a curona.
Ceccillo nun facette pazzie:
arapette ’a porta e se ne iette ammiezz’a via.
’U fatto ’u vuleva cerca’ ’i capi’,
’nu cristiano cu’ ’na curtellata po’ pure muri!
Fuie accussì ca s’arravugliaie
ind’a mille penziere.
’u tradimento ’i ’Maculatina
puteva esse pure ’na smargiassata.
essa, po’, era sempe stata ’nu poco esaltata.
’U banchiere? Chillu coso allampanato…
puteva esse stato accussì disgrazziato?
E po’..? Nuie simme amante!
E ie nun me ne songo accorto ’i niente ?
E po’, si pure fosse stato cecato ie…
m’avessero araputo ll’uocchie i pariente mieie, ’a ggente,
’u quartiere… sicuramente quacche botta m’avesse fatto !
Niente,
tutto è sempe curruto comme l’uoglie.
Maculatina fa accussì
pecché quacche cosa vo’ coglie.
Certo,
me cunviene ’nu cuntrollo,
dummanno,
giro,
allongo ’u cuollo,
ma ’u fatto è troppo gruosso
p’esse accattato all’ingrosso.
Ie ’nce credo, pensate chello ca vulite,
ma ie nun ce credo.
Maculata mia ’n’è capace ’i ’st’azzione…
Essa è… tutta casa e communione.
Mo’ ce faccio ’nu bello regalo,
ce iammo a ffà ’nu viaggetto ’i piacere
e chesta storia fenesce comme ’u sole quanno cala ’a sera.
Tanta sere venetteno
e tanta matine passaiene.
’Maculata,
quanno sunaveno ll’otto ’i sera
lasciava Ceccillo a guarda’ ’a televisione
e… tutt’agghindata se ne ieve a ffa’
’a passiata ’ncorso Napulione
’nsieme a ’u banchiere suie.
“Ceccì… vaco a ffa’ duie passe
E si ’a trovo t’accatte ’a cammisa blu maren,
ca sta buono c’ u cazone ’i gabarden.
P’a misura… sta’ sicuro…
Vecenzino è tale e quale a te
E po’… i banchiere ’ncopp’ i nummere
’nse sbaglieno.
Vuie mo vulite sape’?
comme è stata possibbile ’sta soluzzione ?
Embé… è semplice:
ognuno s’ha girato ’u fatto comme ha vuluto.
Niente trademiente,
niente amante,
niente passione,
niente abbandone.
I chiacchiere d a ggente ?
Ognuno fa finta ’i nun sente.
Maculata e Ceccillo? ’Na coppia tranquilla.
’U banchiere e ’Maculata? Ogne tanto passeno assieme ’a nuttata.
Chiste so’ i fatte.
Ma po’… chi ’i conte
ce fa asci’:
suspire,
minacce,
chiante,
abbracce.
’U marito tradito…
addeventa l’omme moderno
ca capisce ’a mugliera avveluta,
e l’amante dichiarato
addeventa l’amico fidato,
chillo ca te sustene quanno si’ scuraggiato.
’A Storia?
Sentite a me…
nun ve facite fa’ fesse.
’A Storia è ’nu cunto.
Chella ca è passata
po’ esse surtante studiata
e chella ca conta veramente
se costruisce ogne gghiuorne ca Ddie cunsente
P’u riesto…
’a Storia è ’na pazziella !
Ognuno ce mette ’u ssuie:
allonga,
taglia,
azzuppa,
o refonne ’u brodo c’a cuccumella.
***
Questa la versione recitata:
http://www.ponzaracconta.it/wp-content/uploads/2019/08/A-storia.mp3 [2]