di Francesco De Luca
[1]
‘A schiena ‘i ciuccio
cumbatte c’u punente.
Guarda comme sta ‘mpuntato
contro ‘u mare arraggiato!
N’ha viste ‘i fatte…
E’ da i tiempe d’ i Romani
ca assiste a i traffeche
ca ll’uommene ‘mpruvvisano
‘ncopp’a spiaggia soia.
Chiailuna!
Aspetta ca cagne ‘a furtuna.
Passeno ll’uommene
e pure i decisioni,
i legge cagneno
e i crinale se derropeno…
ma quanno ‘a luna
se vò fa’ nu bagno
ind’ all’acqua chiara
ind’a ‘sta cala
se votte a mare.
E ‘a spiaggia te rimane
comme d’ a vita
‘u tiempo cchiù felice.