di Francesco De Luca

Navi che vanno e vengono da Formia, da Terracina, dal Circeo, e mezzi veloci e motoscafi in rada, ai pontili.

Classico parapiglia estivo. Sì, ma questa è la prima dell’anno 2015!

Gente coi bagagli, gruppi che inseguono la guida, coppie in cerca di una barchetta, gli autobus di Pilato a tappo, i mezzi per Frontone in corsa continua.

Bella è ’a staggione

he… comme è bella ’a staggione!

Te mitte ’a for’ ’u barcone

e guarde tutt’ ’a prucessione d’i turiste.

Uarde… uarde e s’appanna ’a vista

cu’ tutte chelli cose ca esceno ’a for’ i vestite.

Ah… quanta abbunnanza…

sciala ’a figliola cu’ ’i cusarelle ’a fore

e sciala ’a vecchia ca ce cala ’a panza.

Se sente uardata ’a signurina

e se mette ’nvetrina ’a tardona

ca se stregne ind’ ’u bichine.

E ’a ggente s’arrevota:

corre a se sdraiàa’,

a se fa’ ’u bagno,

a nun fa’ passa’ manco ’nu mumente

senza divertimento.

Tutte pareno smaniuse

’i se move, ’i guadagna’

comme si ’u tiempo nun ghiesse già tanto ’i corsa

e… cchiù pensammo a comme struie chello ca tenimmo,

cchiù ce scurdammo

ca ind’i sacche

ce sta sulo fummo.

Pare aiere…

quanno ero peccerillo…

ind’a cuntrora

’i vecchie se metteveno for’i case

mmiezz’i vicule, ’ncopp’ ’a Ponta

cu’ ’nu fazzuletto ind’i capille

ca ce scenneva ’nfronte.

Steveno assettate

aspettanno ca ’u sole

feneva ’u spettaculo d’a iurnata.

Se deceveno i fatte,

uardaveno ’a passatan’i pummatore

ca se cuceva a ’u sole,

e faceveno caso,

ind’u silenzio d’u paese,

a chello ca se porta ’u viento,

a ’i sentimiente ca se diceno cu’ ll’uocchie,

a ’i parole ca valeno cuntratte,

a ’i canzone cu’ nu fil’i voce,

a ’u rummore d’a porta ca sbatte.

’A staggione… è ’u turmiento d’a chiattona:

suda, suda, se sosce …

…a cammena’?Eh… e chi ’i mmove ’sti cosce ?

Meglio spaparanzata ’ncopp’ a ’na sdraio,

sotto ll’ombra, ’nfacci’all’aria.

Comme è freccecarella ’i primm’ammatina

…è ancora bagnata ’i ruggiada ’a marina

e ’u sole dà pace

a chi ’u guarda cu’ meraviglia

pecché ind’a tutto ’stu parapiglia

sente che è furtunato,

ca ha dda ringrazzia’ si è nato

e pô senti’ ll’ acqua ca ce arrevoglie ’u cuorpo,

ce dà leggerezza,

ce dà ’a freschezza

e d’a vita siente ’u brivido.

Mo ca ce staie,

mo ca putimmo servì a quaccosa,

’sta staggione

trattammela comme ’na sposa,

ogne ghiuorno cuntento ’i chello ca ce dà,

pecché ’u fatto bello sta cca.

(da “Sische ’i recchie” – Ed. isolaitudine – 2006)

È bella l’estate. Che sia fruttuosa e… rispettosa dell’isola.

Immagine di copertina. Foto di Gaia De Luca