di Francesco De Luca
.
Dint’a stracquatura
.
Pazzielle ‘i criature,
cimme arravugliate,
lattine ‘i plastica sfunnate
e piezz’ i legno a muntune.
Munnezza, schifezza,
tutt’ ammescate
comme fossero state cignute
ind’ a na rezza.
‘A marina pare nu mercato
‘i robba vecchia:
’na bambulella senza capa,
’nu tiraturo,
’na palla moscia
e attuorne piezz’ i canne,
ciòppere, ’nu petecone d’arbero
ianco comme pittato.
Bumbulette smangiate,
taniche ammaccate,
piezze ’i sughero rusecate.
Ma… sfruculianno cu’ l’uocchie
ind’ a stracquatura
cumpare ’nu piezzo ’i legno
cu ’na forma aggrazziata.
’U piglio…
è niro comme ’u craùno;
…’a ponta…
pare ’nu becco ’i paparella,
’u cuollo è snello e slanciato,
’u cuorpo pare tenesse
doie scelle ca se stanne arapenno.
E’ n’ auciello ca vo’ lascia’ ’a terra,
se vo’ alluntana’
’a ’sta spurchizia…
…ha scegliuto ‘u cielo pe’ casa.
Comme ha fatto a sta ’nfussato
ind’ a stu stracquo
isso ca tene grazia, eleganza?
’Nse po’ sape’…
Ind’ a stracquatura,
si tiene uocchie,
truove ’a bellezza
ind’ a ’na forma pura.
Ascolta la poesia, in mp3, detta dall’Autore:
