di Nino Picicco (da una memoria di Mimma Califano)
Ascolta qui la canzone: Gente_essenziale
e leggi il testo:
Gente essenziale
’A rezza ’ncoppa ’a spasara
se stà asciuttanno
a’ pont ’u muolo è pronta già
tutto è pace; nun se sape
ch’è succiesso juorne fà
E songo tre o quatte juorne o ’na semmana
ca stammo ’i lesa pe’ pisca’:
’ncoppa i pizze d’a muntagna
guarda si ’a vide ’i squacchia’
’I notte po’ spaccammo int’à custèra
aspetta’ ca da funno esce ’nu lampo
È vierno e ll’aria fredda spisso gela
jammoce a ripara’ int’a ’na spiaggia
Appiccia ’u fuoco ‘ll’ummedo se sente
trase int’all’osse e ’i spercia tutte quante
che male int’’e ddenocchie ca me vène
jà famme posto, scàrfate, curaggio
Po’ se riparte: i’ vozze poppa a poppa
c’’a rezza mezza a una e mezza a n’ata
allerta Giuantonio ’ncoppa ’a prora
deve istruzzione a tutto l’equipaggio
vucammo chiano dint’ u’ mare scuro
pur’isso stà durmenno int ‘a ’sta calma
Tutta ’na botta proprio sott’a nuje
’nu lampo dint’ all’acqua, n’atu lampo
s’appiccia ’u mare tutt’attuorno a nuje
fa ampresso scioglie ’e vozze ca calammo
’u cchiummo affonna e ’a cuorcete va a galla
e ’a rezza ca va a cegnere i palammete
ma mo n’atu problema pure cchiù gruosso
nuje mo tenimmo d’affruntà
se fa l’ora d’’a partenza ’u vapore adda passa’
allora ’a fore ’a Ravia e tira e voca
nuje sott’’a Torre àmma purta’
chesta rezza ma cuntente ù vapore po’ passa’
E schiara juorno mentre nuje aspettammo
Pe calà ’a leva intanto ripusammo
porta ’u cafè cu ’ll’ànnese cunciato
ce aspetta mò ’na bella faticata
Tre vvote àmmo calato int’’a priggione
p’astregne ’i pisce e pe’ n’avè raggione
c’a coda nuje è pigliammo e ’nt’i spaselle
’i ghiammo a sistema’ p’i purta’ ’nterra
’I menano Girillo e Gavitello
Giuantonio c’u Ferone stregne ’a rezzella
Alesio e ’u Luongo ammazzano int’a prora
quant’acqua sghizza tutt’ attuorno a loro
nu juorno c’ è vuluto a purta’ ’mpuorto
chesta piscata sempe m’arricordo
Trenta quintale avimmo nuje pesato
e tanta pisce a funno so’ restate
dimane quaccheduno chianu chiano
c’u lanzaturo ’i piglia a uno a uno
e tira a bbuordo tira ’sta rezzella
mettimmola a’ ’sciuttà se no se’ngotta
Perciò nuje avimmo spasa a ponta u muolo
tutto è tranquillo: è l’ora d”a cuntrora
