- Ponza Racconta - http://www.ponzaracconta.it -

Aria ’i stammatina

di Francesco De Luca

[1]

 

Aria ’i stammatina

Che aria tira ?
Eee… pe’ responne
all’epoca,
pateme (1)  ’uardava ’u cielo,
i Scuglietelle…(2)  i Furmicule…(2)
i nuvole c’ assummavano ’a Chiailuna…(2)
e respunneva:
“uaglio’… ’nte sta a preoccupa’…
è aria ca passe”.

Ma mo,
chest’ aria ca ‘ncopp’a capa gira
nun stregne surtante ’stu scoglio
’mmiezz’ a mare.
’Sta cappa cupa
avvelesce tutt’u munno…
è n’ aria ’i chiummo.
’A terra chiagne
e nesciuno s’a fila,
’a gente s’addulora
e nun trova pietà.

Che cercheno ll’uommene
’ncopp’ a ’sta terra?
Cercheno ’i cummanna’
vuluntà, cose e natura,
passato, presente e futuro.
Ll’aria ca tira stammatina,
figliu mio,
è ’n’aria ca nun sape ’i mare,
nun tene ’u ddoce d’a ianesta (3),
’n’ arape porte e feneste,
nun sape ’i festa.
Vattenne a casa,
chiudete dinto,
nun vede’ nesciuno.

Già chiagneno i campane,
i vie stanne ’a ppe sole
e ’u mare tene a calma d’a morte.
Supporta…
supporta fino a dimane.
Dimane ’a primmavera
venciarrà
e i runnenelle (4) movarranno ’u viento
ca profumma ’i ’uastaccette (5)
e aleghe nuvelle.
Venarrà ’u viento ’a fore
e sperdarrà ’a parte ’i Zannone (6)
ind’u cielo chiaro
fantasme e mammune (7).
Dimane
vedarraie ’u futuro tuie
ind’ a ll’uocchie dall’ate.
Statte sicuro, ’uaglio’,
’sta’aria malata
ce ’a lasciamme arrete
’a nuttata,
e ’a bellezza d’u criato
ce truvarrà frate.

 

[2]

Note: 1 – mio padre;  2 – luoghi di Ponza;  3 – ginestra;  4- rondini;  5 – ginestra ponziana; 6 – isola dell’arcipelago ponziano;  7- fantasiosa figura da paura.

Versione recitata.

http://www.ponzaracconta.it/wp-content/uploads/2020/03/3.mp3 [3]