- Ponza Racconta - https://www.ponzaracconta.it -

San Silverio mio

by Sang’ ’i Retunne
Battaglia Turchi contro Cristiani [1]

 

Giggino – Sansilve’, io nun t’aggio chiesto mai niente, ma ’stavota m’è fa’ ’na grazia.
S. S. – (…)

Gg – Azz! M’è rispuòst’? Allora ci staje veramente?
SS – (…!)

Gg – No, no Sansilve’, pe’ carità, tu sai cumm’è? Te fanne veni’ i dubbi. Ccà nisciuno te fa accapi’ mai niente, ognuno s’a ggira a mod’ suie. ’U’ prevete po’… Aeee, t’u raccumànn’!
SS – (…)

Gg – E comme no? A’ festa toia ce stong’ sempe: me mett’a cravatt’ e ’u vestito d’ù matrimonio, vang’a chiesa, sude sano sano, chiagn’ e m’appenn’ a varca. Po’ votte  mazzate p’agguanta’ ’u garofano… Figurate ch’all’anno passato m’aggio scassat’a dentiera. ’Na cosa seria. E chi è megli’i me?
SS – (…)

Gg – U Mado’, comme nn’abbasta? E ch’aggià fa’?
SS – (…)

Gg – E comme se fa a ghi’ tutt’i dumménec’a chiesa? Io aggia fatica’ e quando nun fatiche aggia i’ a caccia. Ja’ Sansilve’!! E comme se fa?
SS – (…)

Gg – ’U saccio, ’u saccio che tu si muort’ pe’ chest, e tu perciò si’ santo, è ’u mestiere tuoie. E po’ ’u prevte dice semp’i stesse cose: io m’addormo.
SS – (…)

Gg – Madonna Sansilve’ e comme si addeventate pure tu. ’Na vota, pe’ fa’ ’na grazia, nun’i facive tutte ’sti scazzéll’…
SS – (…)

Gg – E mo’ chesti ccose chi t’ha venute a dicere? Sicurament’ Assuntina. Chella nun se fa mai i cazz’  suoie. Dimme tu che male faccio? Ogni tanto m’ambriaco e facci’u pazzo? Ma ccà ch’ate ce sta ’a fa’? Tenimme sule tuorte e ’a na parte aggia sfuga’!
SS – (…)

Gg – Pure chest’ saie? Ma Sansilve’, cerca ’i arragiunà: song’ allàte che ci’all’hanno cu’ mme, nun song’ ie. Ie me faccio sul’i fatt’ miei.
SS – (…)

Gg– E perché fossene sbagliat’ i fatt’ miei? Allora aggi’accuzzà sempre?
SS – (…)

Gg – Sansilve’, sient’ammé… ’sta storia ’i’llata guancia a Ponza nun po’ funziona’: nun è pe’ nuie. Sicondo me è stata scritta p’i vientutenise.
SS – (…)

Gg – Cosa ti volevo chiedere? No, niente, è che ho saputo che tant’anne fa si stat’ cazz’ i fa’ fuie quaranta varche ’i Turchi che ce vulevano caccia’ ’a ll’isola. Si’ stat’ grande! Guaie a chi te tocca.
SS – (…)

Gg – No no, qua’ ruffianaggine: è ’a verità: si’ stat’ ’na potenza. Tu sì che ci he saputo difende.
SS – (…)

Gg – Comme è acqua passata? Sansilve’ io t’apprumetto solennemente che chied’ scusa a Verucciell’ pe tutti dispett’, facci’a pace cu’ zi’ Michele, nun vatte cchiù a Assuntina e vang’ tutt’i dummeneche a’ chiesa d’u puorto… ma ’na grazia peccerella peccerella me l’he fa’. Pe’ te  nunn’è niente, è ’na fessaria.
SS – (…)

Gg – Tu ch’è fatt’ fuie quattecient’ turchi, mo’ te n’è carria’ uno sulo: ’u Sultano…! Ponza ti sarà per sempre grata. Chest’è!

Venerdì pesce [2]