Ambiente e Natura

Sta fenenno ’n’ata staggiona


di Franco De Luca

 

Leggi, e ascolta qui il file mp3  N’ata staggiona

 

Sta fenenno ’n’ata staggiona:

u’ cauto nun fa cchiù u’ padrone

e  ’n’arietta freccecosa

spanne p’u’ paese ’n’andore

ca pruvene d’u’ mare,

saglie p’i’ scale, p’i’ vicule,

p’i’ parracine

addò mature so’ i’ fechetinie

e ‘ll’uva è gialla

e pronta p’i’ cantine.

’A piazza è libbera d’i’ furastiere

e i Punzise, ca fin’a iere

faceveno i putecante,

mo’ s’aspetteno

pe’ chiacchieria’ a ‘vvacante.

Ponza torna a esse

’nu paese ’i mare

ca ’ns’accuntenta no

’i chello ca tène

e aspetta

ca cagne u’ viento.

Ma u’ viento nun cagne

e ‘ll’anno procede

comme ’a natura cuncede.

Sulo ’na forza

potesse  scumbina’

chistu cammino

ca manna acito ogne vino:

è ’a forza ’i vuluntà

d’a ‘ggente.

Ma chi t’’a dà ?

I viecchie rosecheno u’ ‘ppassato

e s’accuntenteno,

i giuvene ’nse ne curano

e ghiastemmeno u’ ‘ppresente.

’N’ata staggiona

passa ’ncopp’ a ’stu scoglio:

pozza  vunnà

comme u’ ‘bbene ca ce voglio.

 

Francesco De Luca (Franco)

Settembre   2011

1 Comment

1 Comment

  1. sandro vitiello

    17 Settembre 2011 at 09:35

    ..mai parole furono così profetiche!

È necessario effettuare il Login per commentare: Login

Leave a Reply

To Top